Aandag! Die finaliste vir die ATKV-Woordveertjies 2022 is pas bekendgemaak met Afrikaner-sondebok deur Albert Blake en Fortuine deur Ebbe Dommisse op die Prys vir Niefiksie-kortlys!

Albert is ’n gewilde niefiksieskrywer wat al sewe boeke die lig laat sien het. Met hierdie biografie oor die Ossewabrandwag-leier Hans van Rensburg – ’n eerste ter wêreld – poog die skrywer om Van Rensburg se verwronge beeld reg te stel.

• Video: ‘Daar was nog nooit ’n biografie oor Hans van Rensburg nie’ – Albert Blake gesels oor sy boek, Afrikaner-Sondebok?

In Fortuine vertel Ebbe hoe Afrikaner-magnate, waaronder Jannie Mouton, Christo Wiese, Whitey Basson en ander, hul sakeryke tot stand gebring het. Die boek is ook onlangs benoem vir die kykNET-Rapportprys: Niefiksie.

• ‘Jannie, as jy kat en muis wil speel, moet jy seker maak dat jy die kat is’: Lees ’n uittreksel uit Fortuine deur Ebbe Dommisse

Veels geluk en sterkte aan Albert en Ebbe! Die wenners sal vanaf 13 tot 16 September 2022 op die ATKV se Facebookblad bekend gemaak word.

Lees die persverklaring:

Skud jou vere reg, want dit is weer daardie tyd van die jaar wat die ATKV skrywers se uitsonderlike pennevrug, toewyding en kreatiwiteit vier. Die ATKV-Woordveertjies bekroon jaarliks uitsonderlike prestasie rondom die Afrikaanse woord.

‘Dis vir die ATKV ’n groot voorreg om elke jaar eer te gee aan dié wat dit vir lesers moontlik maak om nuwe wêrelde te ontdek deur die geskrewe woord,’ sê Sonél Brits, besturende direkteur: ATKV-MSW.

‘Vanjaar is geen uitsondering nie en die inskrywings was van hoogstaande gehalte. Dit was beslis nie vir die beoordelaars ’n maklike taak om die finaliste te kies nie. Ons sien uit om binnekort die wenners bekend te maak en om vir hulle te wys dat ons hulle werk in Afrikaans raaksien en waardeer.’

Die wenners sal vanaf 13 tot 16 September op die ATKV se Facebookblad bekend gemaak word.

Finaliste (alfabeties gelys volgens van) in die volgende kategorieë sluit in:

ATKV-Prosaprys

• Man op ’n fiets êrens heen – Frederik de Jager (Protea Boekhuis)
• Vier susters – Gerda Taljaard (Penguin Random House SA)
• Veldhospitaal 12 – Marinda van Zyl (Tafelberg)

Prys vir Liefdesroman

• Elisabet se oorlog – Helene de Kock (Human & Rousseau)
• Na ’n plaas in Afrika – Irma Joubert (LAPA Uitgewers)
• Marilyn – Chanette Paul (LAPA Uitgewers)

Prys vir Poësie

• Swatland – Ashwin Arendse (Kwela Boeke)
• Nomadiese sterre – Joan Hambidge (Protea Boekhuis)
• Klinkklaar – Daniel Hugo (Protea Boekhuis)

Prys vir Romanses

• Die Kersfeeslysie – Dina Botha (Romanza)
• Weergalose liefde – Marie-Louise Cronjé (Romanza)
• Omdat jy my gesoen het – Elsa Winckler (Romanza)

Prys vir Spanningslektuur

• Gerugte van ’n ontvoering – Chris Karsten (Human & Rousseau)
• Hartedief – Rudie van Rensburg (Queillerie)
• Ivoor – Jaco Wolmarans (Tafelberg)

Prys vir Dramateks

• Bettie, revolusie en dié woord – Lee Doubell
• Bitterfontein – Corlia Fourie
• Oom Bey, my pa – Henque Heymans

Prys vir Niefiksie

• Afrikaner-sondebok: Die lewe van Hans van Rensburg, Ossewabrandwagleier – Albert Blake (Jonathan Ball Uitgewers)
• Fortuine: Die wel en wee van Afrikaner-magnate – Ebbe Dommisse (Jonathan Ball Uitgewers)
• Van Humpata tot Upingtonia – Nicol Stassen (Protea Boekhuis)

Die wenners van die ATKV-Kinderboektoekennings, ’n kategorie waar die kinders self vir hulle gunstelingboeke en -illustrasies stem, word ook saam met die Woordwystoekenning vir woordeboeke en taalgidse en die Toekenning vir Leesbevordering aangekondig. Dié wenners in die drie kategorieë sal ook tussen 13 en 16 September op Facebook bekendgemaak word.

Einde

Categories Afrikaans Non-fiction South Africa

Tags Afrikaner-sondebok: Die lewe van Hans van Rensburg Ossewabrandwagleier Afrikaner-Sondebok? Albert Blake Ebbe Dommisse Fortuine Fortuine: Die wel en wee van Afrikaner-magnate Jonathan Ball Uitgewers